1Ch 17 | NdeIBE | STEP | UDavida esehlezi esigodlweni sakhe wasesithi kuNathani umphrofethi, “Uyabona, mina ngihlezi esigodlweni esakhiwa ngomsedari, kodwa ibhokisi lesivumelwano sikaJehova lingaphansi kwethente.”

1 Chronicles 17

Isithembiso SikaNkulunkulu KuDavida

1 UDavida esehlezi esigodlweni sakhe wasesithi kuNathani umphrofethi, “Uyabona, mina ngihlezi esigodlweni esakhiwa ngomsedari, kodwa ibhokisi lesivumelwano sikaJehova lingaphansi kwethente.”

2 UNathani wathi kuDavida, “Konke okusengqondweni yakho, kwenze, ngoba uNkulunkulu ulawe.”

3 Ngalobobusuku ilizwi likaNkulunkulu leza kuNathani, lisithi:

4 “Hamba uyetshela inceku yami uDavida uthi, ‘Nanku okutshiwo nguJehova: Ayisuwe ozangakhela indlu yokuhlala kuyo. 5 Angikahlali endlini kusukela mhla ngakhulula abako-Israyeli eGibhithe kuze kube lamuhla. Sengibhode ngisuka kulelithente ngaya kuleliyana, ngisuka endaweni ethile yokuhlala ngisiya kweyinye. 6 Konke lapho engihambe khona labako-Israyeli, kambe kukhona lapho engike ngathi kubakhokheli babo engabalaya ukuthi bagcine abantu bami, “Kungani lingangakheli indlu yomsedari?” ’

7 “Ngakho tshela inceku yami uDavida ukuthi, ‘Nanku okutshiwo nguJehova uSomandla: Ngakuthatha emadlelweni ekwaluseni izimvu, ukuze ube ngumbusi wabantu bami abako-Israyeli. 8 Ngibe ngilawe lapho obuhamba khona, ngizinqobile zonke izitha zakho phambi kwakho. Ngalokho ibizo lakho ngizalenza libe lodumo olufana lamabizo amadoda adume kakhulu emhlabeni.

9 Njalo ngizalungisela abantu bami bako-Israyeli indawo engeyabo ngibafake khona labo babe lekhaya labo lapho abangayikuhlutshwa khona. Abantu abagangileyo abasayikubacindezela futhi, njengalokhu abakwenza kuqala 10 lalokhu asebephikelele ukukwenza kusukela ngibeka abakhokheli bami bako-Israyeli. Ngizazinqoba zonke izitha zakho. “Ngiyaqinisa kuwe ukuthi uJehova uzakwakhela indlu: 11 Kuzakuthi nxa isikhathi sakho sesiphelile ususiya kubokhokho bakho, ngizakhetha phakathi kwenzalo yakho lowo ozathatha isikhundla sakho, omunye wamadodana akho, njalo ngizawuqinisa umbuso wakhe.

12 Lowo nguye ozangakhela indlu yami, ngakho ngizamisa isihlalo sombuso wakhe kuze kube nininini. 13 Ngizakuba nguyise, yena abe yindodana yami. Angiyikususa uthando lwami kuye, njengalokhu engakwenza kulowo owakwandulelayo.

14 Ngizambeka yena endlini yami lasembusweni wami kuze kube nininini, lombuso wakhe uzakuma kokuphela.”

15 UNathani wabikela uDavida amazwi wonke esambulelo.

Umthandazo KaDavida

16 Ngakho inkosi uDavida wangena wahlala phambi kukaJehova, wasesithi, “Ngingubani mina, hawu Jehova Nkulunkulu wami, bayini abendlu yami, lokho okwenze waze wangibeka kulesi isimo? 17 Kanti njalonje lakho kubuye kukhanye kungathi kakwenelanga emehlweni akho, O Nkulunkulu, usukhulume ngelizayo ngendlu yenceku yakho. Ungiphethe Nkulunkulu wami, awu Jehova Nkulunkulu wami, kungathi ngingomunye wabaphakemeyo kakhulu.

18 “Kambe kuyini okunye uDavida angakutsho kuwe ngokuhlonipha okwenze encekwini yakho? Ngoba wena uyayazi inceku yakho, 19 O Jehova. Ngenxa yenceku yakho, njalo langokuzithandela, ukwenzile lokhu okukhulu kangaka waziveza obala lezizithembiso ezinkulu kangaka.

20 “Kakho ofanana lawe, O Jehova, njalo kakho omunye uNkulunkulu kodwa nguwe kuphela, njengoba sesizwile ngezethu izindlebe. 21 Njalo ngubani ongafanana labantu bakho bako-Israyeli esiyiso sodwa isizwe emhlabeni esiloNkulunkulu owayazikhululela abantu, lokuzenzela ibizo, lokwenza imimangaliso enzima ngokuxotsha izizwe phambi kwabantu bakho, owabakhulula eGibhithe? 22 Wabenza abako-Israyeli baba ngabantu bakho impela kuze kube nininini, njalo wena Jehova usunguNkulunkulu wabo.

23 “Lakhathesi, Jehova akuthi lesosithembiso owasenza encekwini yakho labendlu yayo sigcwaliseke kuze kube nininini. Yenza njengokuthembisa kwakho, 24 kuze kubonakale ukuthi ibizo lakho lizaphakanyiswa kuze kube nininini. Ngakho abantu bazakuthi, ‘UJehova uSomandla, uNkulunkulu ka-Israyeli, ngoka-Israyeli uNkulunkulu!’ Kuthi indlu yenceku yakho imiswe phambi kwakho.

25 “Wena Nkulunkulu wami ukuveze obala encekwini yakho ukuthi uzayakhela indlu. Ngalokho inceku yakho isithole ukuqiniswa ekukhulekeni kuwe. 26 Hawu Jehova unguNkulunkulu wena! Usuthembise lezizinto ezinhle encekwini yakho. 27 Ngakho kukuthokozisile ukubusisa indlu yenceku yakho, ukuthi ibe khona phambi kwakho kuze kube nininini ebusweni bakho; ngoba wena, O Jehova, uyibusisile, njalo izabusiswa nini lanini.”